FORFATTARKultur
Får sin eigen romanserie:

Silje (31) frå Stord vann skrivekonkurranse

Silje Huglen Tillung vann skrivekonkurranse hos eit kjend forlag – og får skriva sin eigen romanserie.

AV Henrik Mundal Andreassen
Publisert
Oppdatert:

I sommar lyste Norske Serier ut ein skrivekonkurranse på Facebook-sidan deira, som dei kalla for «Skrivesommer 2019».

– Eg har alltid likt å skriva. Heilt sidan eg var fire år har eg lest og skrive. Eg elskar å grubla på idear, og bestemte meg for å prøva å senda inn, seier Silje Huglen Tillung.

Juryen var ikkje i tvil

Alle skriveglade vart oppfordra til å senda inn eit romanutkast, i form av nokre kapittel og ei kort oppstilling av kva resten av boka skal handla om, slik at juryen kunne vurdera teksten opp imot ein potensiell serie på 5–6 bøker.

– 39 bidrag vart send inn til skrivekonkurransen. No er ein verdig vinnar kåra. Juryen var aldri i tvil, det måtte bli Silje Huglen Tillung, skriv forlaget på Facebook.

– Eg vart heilt sett ut då eg fekk beskjed om at eg hadde vunne. Eg vann eit reisegåvekort på 12.000 kroner, men det er jo berre småtteri med tanke på at eg får lov til å skriva for sjølvaste Cappelen Dam, smiler Huglen Tillung.

Skribent til dagleg

Ho jobbar til dagleg som innhaldsprodusent i marknadsavdelinga til Mediehuset Sunnhordland. Huglen Tillung har også jobba som frilans journalist. Ho elskar å skriva, og no har ho fått endå ein grunn til å skriva meir i tida framover. Dette blir hennar første bok, og ikkje minst hennar første romanserie.

– Det blir travelt, eg har jo jobben, mann og tre ungar heime. Men eg ser verkeleg fram mot å skriva i tida framover, seier Huglen Tillung.

– Har du ein plass du likar å skriva – der du får skrivero?

– Familiehytta på Voss er ein fin plass å vera når eg skal skriva. Der har eg skrive ein del, så eg ser ikkje vekk frå at det blir meir turar til hytta i tida framover. Slik at eg kjem meg i skrivemodus, smiler forfattaren.

– Kva handlar romanen om?

– Eg får ikkje lov til å seia så veldig mykje om historia anna enn at det er ei historie som er henta frå min eigen familie, spesifikt mi eiga oldemor si historie frå gamle dagar, seier Tillung, som fortel at boka har arbeidstittelen «Veidemannens datter».

Norske Serier er eit seriekonsept av Cappelen Damm, og er ifølgje forlaget landets mest leste serieromanar. Bøkene handlar kort fortald om hendingar og menneske frå ei annan tid, fortald i eit serieformat på rundt fem-seks bøker.

Klikk for å sjå kommentarar

Vil du ha nyheitsbrev frå Sunnhordland?

* må fyllast ut